मला वाटते लोन मिळावे

मला वाटते

मला वाटते लोन मिळावे
कोटी अथवा अब्ज मिळावे
परत करण्याची वेळ येता
दूरदेशी मी भुर उडावे

सगळ्या बँकेत अर्ज करावे
मिळेल तितके ढापून घ्यावे
पुन्हा कधी ना तोंड दावावे
मला वाटते लोन मिळावे

तुमच्या बँकेमध्ये जाता
पेनालाही तुम्ही दोर बांधता
तो पेनबी (pnb) घेऊन जावे
मला वाटते लोन मिळावे

जरा फुकाचा पैसा येता
सगळ्या दूर होतील चिंता
ऐषोरामात खूप लोळावे
मला वाटते लोन मिळावे

सर्व पैशाचा करून चुराडा
परदेशात मजेत जगावे
सगळी बोंबाबोंब पहावे
मला वाटते लोन मिळावे

रिकामी मग बँक होता
एक एक पैसा भरेल जनता
मी कशाला चिंता करावे
मला वाटते लोन मिळावे
© राजेश खाकरे
rajeshkhakre.blogspot.in

माफ कर यार दुःखा

माफ कर यार दुःखा

आलास तू जीवनी कितीकदा, केलेस वार दुःखा
डगमगलो ना कंटाळलो, माफ कर यार दुःखा

माझ्या सूर्याची सकाळ उगवली नाहीच केव्हा
अंधाऱ्या रात्रीची मला, सवय झाली फार दुःखा

तो तुझा विषारी डंख, चावत नाही आता मला
जाणिले केव्हाच आहे, जीवनाचे सार दुःखा

कर्ज माझ्यावरी आहे ते चेहऱ्यावरच्या हास्याचे
उपकार त्याचे कसे फेडू, झाला आहे भार दुःखा

शिकलो मी कितीक गोष्टी तुझ्या जीवनी येण्याने
खरे तर माझ्यावरती, तुझेच आहे उपकार दुःखा

हरलोच नाही जीवनात अगदीच असेही नाही
हरुनि हरुनि जिंकलो मी,तुझाच आधार दुःखा

© राजेश खाकरे

मो..7875438494                                                                                

rajesh.khakre@gmail.com

ग्रहण